A Xunta abre un proceso de participación para o desenvolvemento da Lei de xuventude de Galicia
O novo decreto regulará os servizos de información, a formación, as actividades, as instalacións e os carnés de servizos en materia de xuventude
Todo o mundo interesado está convidado a participar no proceso.
A Consellería de Política Social está a traballar na elaboración dunha nova normativa en materia de xuventude para responder a moitas das necesidades e demandas que existen na actualidade neste ámbito. Así, o novo decreto desenvolverá os seguintes aspectos xa contemplados na Lei de Xuventude de Galicia: a información xuvenil, a formación da mocidade, as actividades dirixidas a este colectivo, as instalacións xuvenís e os carnés de servizos para a xuventude.
Así, e co obxectivo de coñecer e contar coa opinión, inquedanzas e necesidades dos distintos axentes implicados neste ámbito, a Dirección Xeral de Xuventude, Participación e Voluntariado abre un proceso de participación que articula a través da organización de sesións de traballo con esta temática, un espazo web como canle de información, unha caixa de correos electrónicos específica e, para recoller as conclusións, o III Foro aberto do tempo libre.
A finalidade é que a normativa que resulte sexa froito da implicación activa da cidadanía interesada e do consenso. De feito, este proceso está aberto á participación da cidadanía en xeral, e en particular, a técnicos e informadores xuvenís, escolas de tempo libre, monitores e directores de tempo libre, asociacións e entidades que presten servizos á xuventude, titulares de instalacións xuvenís ou empresas que traballan no ámbito da xuventude.
Están fixadas cinco xuntanzas, catro tiveron lugar neste mes de abril e a outra será en maio. A última das reunións terá lugar na Escola Galega de Administración Pública en Santiago o vindeiro 2 de maio.
O horario común a todas as xuntanzas de traballo será o seguinte: formación e actividades xuvenís, de 16:30 A 18:30 horas; e instalacións xuvenís, de 18:30 a 20:00 horas.
As inscricións hai que facelas cubrindo o formulario que está no seguinte enlace, e como máximo tres días antes da celebración.
http://xuventude.xunta.es/novo-decreto-de-xuventude?id=8747
Paralelamente a este proceso posto en marcha desde a Xunta, a plataforma SOMOS TEMPO LIBRE, que nace co obxectivo principal da posta en valor do Tempo Libre en todos os seus ámbitos, fai as súas reunións e as súas aportacións.
Esta plataforma xurdiu nas xornadas do Interactuando 2016. Camiñamos paseniño dende aquela coa intención de construír un colectivo sólido, representativo e duradeiro.
Desde a plataforma Somos Tempo Libre fan a seguinte convocatoria:
O vindeiro domingo 23 de abril, ás 17:00, na residencia Monte da condesa de Compostela, celebrarase unha xuntanza do colectivo Somos Tempo Libre, na que se desenvolverá a seguinte orde do día:
- Benvida ás novas compañeiras/os, traxectoria do colectivo ata hoxe e organización e funcionamento do grupo.
- Lectura da acta anterior.
- Decreto 50/2000, – Achegas dende Somos Tempo Libre. – Novas addendas.
- Xuntanzas desenvolvidas, – Delegación de Política Social en Pontevedra. – Sesións de traballo novo Decreto de xuventude en Ourense e Lugo.
- Vindeiros pasos, – Obxectivos – Accións – Visibilidade
- Outros.
- Asignación de tarefas.
Para participar nesta xuntanza hai que mandar un email a somostempolibregalicia@gmail.com
Si queres ver toda a documentación sobre a que se está a traballar e un adianto do borrador do novo decreto, PINCHA AQUÍ
